牛

一個「牛」字讓你想起什麼意思，什麼詞彙？
讓我即場示範：食用的「牛」、話人「牛精」、講極唔知的「對牛彈琴」、點極唔明的「牛皮燈籠」、「X丁解牛」(那篇會考中文課文)、「牛魔王」、話人大胸的「母牛」、作嘢的「吹牛」……想不到了。
其實又想講新詞彙。而且，又是那位髮型師，那位教我「大咪」為何物的髮型師。(又)話說髮型師建議我染髮，我問染何色方好，髮型師道啡色妙。我回問啡為何啡，髮型師道爾不好誇張，選深啡為上佳，又道淺啡太牛。淺啡太「牛」作何解?這比上次那道大咪謎(對我來說絕對是個 — 謎)更讓人難以理解!
髮型師續答，牛為MK是也。
MK是「牛」?大惑不解。
續問典故出處。髮型師答，都係咁講啦d人。我問，咁牛剩係用來形容MK人乎?他答，不是。我問，仲有咩人都可以話佢牛?他答，地盤工人呀，棟起隻腳坐，都可叫佢為牛。我問，那牛是否等於地踎?他說你都講得幾中，同埋即係話人冇文化囉。我話，唓，若果係解地踎，唔比人著MK火炎闊褲，但全部火都鑲晒石，唔地踎啦咁。他答，你講嘅case太罕有。我問，可否以牛仔牛女叫人話佢mk?他答，不會，太cute。我話，今次這個詞語仲偏過上次個大咪，係咪呃鬼。他答，你陣間去MK對住MK人大叫你好牛，且看他們的反應。
糟糕，越想越不妥。會否真的被騙了?那我接下來個多月的追查成果就會成為他的笑柄。
不過，我還是要繼續。而且，我已經啟動了。
晚上跟朋友提起剛才的事，兩位朋友O了咀，認為此解釋太難令人信服。其中一友謂此釋可能源自內陸。及後展開關於「牛」一詞的討論，原來在大陸台灣，用「牛」字組成的詞語還不少：（一）牛B。在大陸討論區中看到的。完全不明白！
（二）牛。在大陸討論區看到的。解為「厲害得霸道」。
（三）放牛班。台灣用語。成績不好的學生聚在一班，沒得到老師的照顧，因為他們的精力都放在成績好的班別處。這些班就為「放牛班」。
後來，我跟髮型師說，我會再問我d朋友然後返來話你知。他笑說好呀，一派放馬過來的樣子。我說你可以試試用d怪字吸引d客定期搵你。他笑道咁咪即係話我唔夠掂。我話那是錦上添花。
死啦，會唔會真係中咗計?