2014年10月27日星期一

冇亞健康狀態嘅波地



運動就快滿月。先前日夜擔心么折,但眨吓眼又捱過各式前所未見嘅細菌病毒,唔算越嚟越壯,但至少襟捱 — 要上中學喇卦?每次去都係重有新鮮,但最石破天驚,由零到一嘅出世已過;啲嘢成熟嘅時候,就算由一變一百萬,都唔夠刺激(更何況而家唔係)。同預期一樣毫無實際作用嘅對話毫無用處咁完咗後,幾日冇走落現場,同自己講要休息,實情可能係*革命*嘅熱情經已減退。後生仔,硬係唔定性,亦唔夠堅持。

會唔會喺呢個時候,唔知邊個推開牛鬼蛇神啲低能冇腦濕㞗招,突然以雷霆萬鈞之勢,一下清旺再清金鐘,又會否留下黃藍綠紅白絲都當冇到,猶如孤兒嘅銅鑼灣。

仍然攬住催生成件豐功偉業嗰三位,冇顧不進則退嘅原則,抗爭由公投剃頭到佔領,拉埋暫時承擔滿分嘅後生,又去返公投,就好似細個捉蛇象棋咁上咗條梯,又滑落條蛇度,永無止境。雖則已入寒露,但大家行出嚟仍然身水身汗,何況唔係一開始就有四大訴求,做乜又要投返轉頭,着實百思不得其解。如此決定,佢哋話係「魯莽」,同之前離奇地叫撤如出一轍,確實溫吞,舉棋不定,好似好想件事快啲完aka無疾而終咁。

可能事情更似太平天下。既然敵方暫無飛機大炮,我軍定要好好建築保護罩,使城堡更牢固,更難攻得入。定係,其實應該親幾儲定彈藥,一舉將之殲滅?講就天下無敵,諗就有心無力(諗起一位智慧高超嘅精英,喺面書上話運動要有「謀略」,要令商界和其他「持份者」支持,否則只是一腔熱誠,有勇無謀,云云。點計都至少係半個「持份者」嘅佢,叫乜都冇嘅學生去諗計令「持份者」支持,確實大開眼界。與其企高一級指點江山,倒不如一開始坦白啲講「更加要努力搵錢移民」,至少真心),我都係一個法子都冇,不過剩係覺得周而復始嘅晚會開始令人怠倦。大眾在會上要畀嘅歡呼同倒彩位,越來越似做愛時敷衍嘅叫牀。

咁講可能太過偏激,好似結婚結得耐過頭嘅老夫老妻,慢慢唔記得新婚時嘅好咁。今日再去金鐘,近乎係個嘉年華,有禮物攞,有相影,有好多公仔睇,重有做咗好事嘅快慰,肯定滿載而歸。我唔覺得所有人都係咁,但我想自己稍為警愓。

其實,最令我開心嘅地方,係見到香港啲地少人超多,冇定郁嘅問題,係可以開一兩條路咁去解決,冇機構「管理」一樣井井有條,而且創意爆過所有創意中心。同朋友講起,不論此事結果,若果金鐘旺角可以保持咁樣,又或者至少周末變到咁,成個城市一定可愛好玩好多好多好多好多。


穴位按摩治理痛症,一按落去唔痛唔得,最肉酸最黑暗最匪異所思嘅嘢一次過逼晒出嚟,伴隨舒筋活胳嘅暢通坦然,最後換得一個冇亞健康狀態嘅波地。為咗冇亞健康狀態嘅波地,堅持。堅持之餘,亦好想諗下一步點做。

2014年10月12日星期日




只有泳池

才是最為靈敏的先知

潛進它令人頭皮刺痛的冰凍之驅

頭殼下蔚藍天空的夏日假象

一下戳破



慢慢軟化的風

早已送信至毛孔

秋日在夏冬之間拉扯

盪然無存

指日可待

有心之人

早作準備



多年無談話的老師過身

終於


離世的哀傷

無法施手術

按摩或可舒緩

但難以根治



秋日

一切都放輕腳步

延長

拉闊

空盪

且看


2014年10月9日星期四

長大成人



當講求效率乜都要快嘅香港,主要幹道都要讓路俾內心憤怒而堅決嘅市民,確實震憾同感動。香港人一洗平日功利現實又細膽嘅形象,裏頭嘅人雖則憤怒,但比平日更風度翩翩,話係示威但井然有序,互相愛護兼夾愛護環境,比平日街上面逼到實一實,但又冷漠疏離好不知幾多倍。其實,我一直打定輸數,拖泥帶水嘅佔中,佔極都係得個樣,到講到口嗅嘅嘢生咗出嚟,重要生到出嚟咁正咁靚,化為人人有份嘅遮打運動,真係振奮到不得了。錦上添花爆多咗個旺角同銅鑼灣,絕對有平分春色之勢,區區各有睇頭各有可愛。先前兩大旺區可避則避嘅人多擠逼抖唔到氣,直頭係有復活嘅神聖,光復嘅喜悅,心想有幸見證此景,先算喺香港活過。佢哋有如啲啱啱出世嘅BB,時時刻刻見都有睇唔厭嘅可愛,新增嘅橫額帳蓬就係佢哋嘅一條新頭髮、一隻新牙,每樣都充滿朝氣,覺得佢哋好快就會大個仔大個女。

呢個美好嘅幻象,一直維持到上個禮拜五。原來生得好地地嘅BB,可以畀人無端白事,卑劣咁掐一下、鋤一下、扑一下,新生出嚟嘅頭髮扯斷,牙齒脫落,不似人形,有個營養不足嘅么折咗。大家見狀,又一個一個走返出嚟,好好保護新生命。更磨人嘅可能唔係實實在在嘅明罵暗打,而係空穴來風未必無因嘅謠言,一次一次覺得自己就快要為佢哋犧牲,一次一次覺得自己被欺騙,但亦只能寧可信其有。幾攰大家都要坐喺度,感受或明或暗嘅各式攻擊。真係攰到要返歸,又硬係心掛掛,第二日起身第一件事,就係要睇睇面書,確保寶寶安然。的而且確,近日只要得閒,係冇理由唔去探佢哋。就算唔得閒都要探,可想而之佢哋嘅地位,就好似要去朝聖咁。

尋日下晝,我驚星期一人少,走咗出去。由金鐘地鐵站C出口一出,我已經好習慣行出去就係行出大馬路,好習慣呢幾個地方係行人專區,好習慣呢度好似另一個香港。或者係慢慢長大咗,雖然每次嚟都一定有新發現,但之前嘅震憾慢慢化為日常生活嘅一部分,雖然依然持之而行,但有時又覺得做與不做,其實可有可無,大概有啲似返教會,喺一個所有人事物都肯定自己深信嘅事嘅環境,聽得太多做得太多自己深信嘅事,過分強調反而顯得有啲唔可信,開始有啲模糊。有時,呢度又有啲似公園,喺秋風同柔和日光下,坐住享受生活嘅人。當然,呢啲都係政府拖字訣之下生出嚟嘅假象。

我而家坐咗係夏慤道匯豐對出嘅嗰條壆度,睇住夏慤道上金鐘嘅天橋,嗰條成日夜晚搭車過九龍會經嘅天橋,有疏落嘅人向兩個方向散步緩慢咁行,除咗「示威」嘅一群,都好似有唔少放工嘅人,打一條舒適嘅行人路回府,細心睇吓一座座高樓大廈同天橋,同埋中間嘅天空其實係咩樣。又有數個飲得略醉嘅西裝友,喺條馬路上嬉戲。

坐喺夏慤道嘅中間,先知原來夏慤道嘅西行線比東行線高咗唔少。當夏慤道去到政總出面,成條路嘅最高點係中間,西行線同東行線都斜咗落去,所以最好嘅坐法一定係靠住個駁,雖然硬係覺得啲嘢會跌咗出去。

我好努力咁撈喺個池入面最深而最中嘅想法,但硬係撈唔到,只能捉住橫節末節,亦只好如此。我真怕我唔記得嚟呢度嘅原因,而唔係為做而做。我亦記得我同自己講過要堅持,堅持係行動,更係心態。

佢已經唔係BB,冇得期望佢日日都咁可愛,咁有驚喜,咁大上大落。但佢都係要養,要照顧,先至會長大成人,先至會自立門戶,先至唔使我哋掛心(雖說長憂九十九)。到時,就係我哋靠返佢轉頭。