鑽出來的廿九晚飯

飽受深夜鑽街滋擾，精神只能集中在爆粗上，為免負能量過剩，順道練字，該寫點什麼好事。



小妮子生日，去了吃生蠔。 以前有點怕（堅怕！）的女子，誤打亂撞的也變成個朋友，發生過些幼稚的小事，之後又是朋友，也成了小有會定期主動見見的人。可以扮老氣的說句際遇就是這樣無法估計嗎？

一輪工作旅行他人雜事的近況後，生日飯始終要帶到生日去。行將廿九的女子，對於三十此關口無限慌張。三十喎！三十喎！好老啦我！*她喝了一口白酒，把三十如口中污氣吐出來。

但三十是吐了不會變廿五，她還是知道的。

對世俗觀念都有個認識，但若不是她提起三十歲人，要結婚啦，我又會想不起這件事。女子嫁就有個家之說太深入人心，為了一探這個而今十劃冇一撇的「女家」，女子去了算命。師傅上年說，妳出年 — 亦即今年 — 嫁嗰囉喎！

「咁我點呀！今年已經過咗一半喇！我連條毛都冇呀！*」她說。

我也呷了口白酒，附和道，係囉，都過咗一半囉。

「若果今年唔嫁，就要到後年，但後年啲姻緣冇咁好呀師傅話。」「咁冇都冇得上急就章。」我勸道。

「師傅有話屬D、F同M都得，D係首選；你快啲幫我留意吓啦！」我腦內掃過身邊所有可上的男子，但屬D、F同M嘅，冇貨。「好，我幫你留意吓啦。呀，禮拜有個派對，好多鬼喎，來嗎？」

「你成日都幫我留意，我都幫你留意吓先。」一派互惠互利地說。



 這時，街外的緊急掘地工程終於完結，深水埗居民可以安寧的睡覺。故事待下次鑽地時繼續 — 若果佢哋咁斗膽再深夜鑽！可怒也！




 *設計對白 — 大概講咗呢啲嘢。另外，講得太多，可會遭殺人滅口？敘事練習， 敘事練習。