近身物無一不給我這辣手摧花，件件五勞七傷。而我又慣了讓這些吊鹽水等死的植物錢包鞋子殘存於世，一日眼睛開住就當健全人士看待，日日做十三粒鐘唔停手。
弊在科技用品一但唔生唔死，激心程度絕能引發多重急性病。捱了三年的艾撲﹒懶佬一世，月前忽然在一早撤手塵寰，再也聽不見他多變的聲韻。去得這樣安祥，有福矣，阿彌陀佛。
這邊廂懶佬死得暢快，那邊廂的愛納信．七五零．艾卻死唔斷氣，但又早已柏金遜老人痴呆失禁俱全，食齊靈芝燕窩都唔會好返。身負跟外界聯絡重任的她，傳話細聲斷片已不事小，但有人搵你時即場瞓覺，叫番醒後想知係邊個搵你都唔得，就真係殺得死人。當她當著你面睡著時，你就知道，你要送她一程。
話送話送，送足三年都請唔走，咪又係個句：鬼叫冇錢！
一死一半死逼我認真思索，當前得解決的事包括：
一) 隨身聽
二) 電話+短信
三) 輕便拍照
當下科技一日豈只千里，而我又早已落後成廿個身位，如不借此契機，急起直追，給標籤作老一輩人之日近矣。故此，好些人都跟我引薦久仰的蘋果艾風，謂三大需要有齊又潮云云。
可是，一直一直覺得，由朝到晚都已給科技包到實一實，工作娛樂皆無電腦不可；若是連近身物都可上網又打機，豈不徹底的奉獻給電腦？眼見有蘋果艾風的朋友，即使大群人聚會，照樣為了在只容得下機主的螢幕上左掃右篤，跟其他人繼續沒交流。終於明白，小時候父母為何總不准飲茶時打機。
也許跟簡約有關。不是指無印那種賣生活優雅個隻；而是覺得，若果乜狗屎垃圾都放嚮身，咁只會攰到抽筋。近年都希望做到，沒需要的人事物，就別攞埋身。更何況，任何時間也能在無邊網絡四圍走，稍欠定力一定走唔出來。一開始就拒卻進入，誠然為最佳辦法。
當然，科技絕不是狗屎垃圾，只是做乜用乜過量都不好吧。現在對著電腦的時間已經夠多了。
事實是，在沒有隨身聽的日子，雖然有時會忽然間很想聽一首歌，但也慢慢習慣了自己哼吓 — 還戒得掉，心想。
另外，近日愛納信．七五零．艾忽然康復起來，電話短訊無誤傳。撇除外貌舊得可當科技活化石，我決定待她壽終正寢為止。一是不浪費、二是懶、三是沒錢(最重要)。
且看她尚有多少日子。
掙扎完畢。
(其實本文的大半在大半年前寫成。買電話之事依舊了無進展，續寫竟然毫無難度。哀哉。)
沒有留言:
發佈留言