話死唔死咗幾年嘅電腦，月前病入膏肓到唔可以再入，也終於捨得買部電腦。貪過癮加慫恿底下，買了部蘋果來玩。既然要買桌上型，又只是分期，就決心買部最大的 — 廿七吋螢幕的艾麥。
對慣四角早已變色的十七吋螢幕，井底蛙一見又大又白一件過的艾麥，滿心歡喜之餘，也開始懂得擔心早前朋友的忠告：地方細細，是否食到廿七吋？當時心想，唔買最大，好蝕。又想，書桌也不是小，廿七吋，撐得住。
幸運的是，如我所想，書桌的確供奉到艾麥，左右兩邊甚至有空位剩。而且，深啡色的書桌跟雪白艾麥成了對黑白配，看起來倒是對天作之合 — 如果遠看的話。
原來容不下艾麥的不是書桌，而是房間。又不能說是房間的問題，而是房間格局的問題。書桌和床對著放在窗的左右。坐在桌前，就是背著床。坐的位置，也是床和書桌間的空隙，當然不寬。除非坐在床上，否則跟書桌距離想遠都難。
問題也在這裡。以前十七吋就剛好，第一次在家把玩艾麥，頂頭出現的訊息，都得抬頭看。我估，那抬頭的幅度就像在地下看二樓！
左右都係。要看一左一右的視窗，倒像在尖沙嘴碼頭看北角和西營盤。一坐在艾麥前，頭部就上下左右又搖又轉，像做伸展運動般。
其實，只要可以坐得遠點，一切都好。鬼叫後無退路！太身臨其境的視覺體現，遲早整盲我對睇半日螢幕就攰到傻的可憐眼。
另一個解決方法，是把坐位升高，令眼睛水平跟艾麥頂看齊，合符正確電腦使用坐姿。可是，椅子是十數年歷史了，上升下降做不來。
現在對了兩週，退到退無可退，伸直條腰坐，然後將頂頭出現的東西由二樓拉落地下睇，是自救方法。呀，唔知係對耐咗定點，艾麥廿七吋又成了習慣，頭也繼續上下左右擰了。
循例都要扮有啟發性。透過此事，我體會到：
（一）冇咁大個頭，唔好戴咁大頂帽
（二）機關算不盡
都懂了。艾麥，謝謝你。
（縮細一點點吧，可以嗎？）
沒有留言:
發佈留言