師傅與藝術

作品是塊木和石製的棋盤，須刨邊，但不懂切裁， 手工亦欠佳，救星又在上班，問做裝修的爸爸哪裏有舖頭可幫忙。阿爸二話不說：「我同你去睇吓！」

就這樣，頂着肚腩，戴黑膠框，像隻龜的光頭阿伯，和我緩緩地到工作室。看了看木板，說：「唔使去木工舖，用機刨我都刨到！」

又頂着肚腩，由石硤尾行到西九龍取架生，再行回來石硤尾。 老爸將木板架在高櫈上，在走廊起勢刨呀刨，很有師傅的架勢。

刨好了一邊，但刨得岩巉，我看着另外整齊的幾邊，就知出事。阿爸一副「做乜春」嘅樣，問唔係刨邊咩。係我錯，冇講要刨成點！

我話，呢件係作品，要刨到好似另外幾邊咁。爸爸用「我冇錯！」嘅師傅口吻話「佢哋用大機刨，刨唔到好似佢哋咁。」 又立即致電朋友：「你喺唔喺廠，我個仔要刨塊木。唔喺？好啦 — 你呢排搞緊乜？」

我只好致電上班中的高人，說還是用手鋸。老爸說：「唔使我喇吓，我走喇。」我連聲道謝。

最尾，親自動手比想像中容易得多，效果竟不錯，爸爸刨的邊亦作潤飾，才安了心。

晚上回家吃飯，爸爸問木板可好。我說都好了，阿爸女友問做乜，阿爸說：「佢做嗰啲『藝術』，要刨塊板嘅邊。」 



這是爸爸第一次用「藝術」一字，標示我的「工作」，聽來好像小朋友學會叫聲「爸爸」一樣。也和聽到小朋友懂得叫「爸爸」一樣，感覺很奇妙。