Far L'Amore

電影音樂有時像一道菜的醬汁，當然不是主食，亦不會吃得飽，但若配搭得宜，甚或奇軍突起，自然畫龍點睛，更上一層樓。最勁的電影音樂，有如有啲餸係為食個汁一樣，坐正。
 ＜羅馬浮世繪＞的醬汁精挑細選，每首音樂都為場景人物劇情添了幾分姿色。
最搶耳搶眼的，一定是前面這幕派對的＜Far l’Amore＞，一聽就令人想起奢華糜爛的縱情狂歡。回家後在Youtube日播夜播，無法抑止，可真是着了魔。
和朋友訴說聽同一首歌由朝搖到晚的新染惡習，同樣看過此戲的朋友感同身受：我都係咁播呀！停唔到！
兩名病患者一講起，回味無限，欲罷不能，一起對着Youtube影片重溫這華美的一幕。
點解個個都咁靚㗎！
係囉，咩年紀都咁靚。
個個好似喺花生騷行出嚟咁。
這才是上流社會的派對。
遠東鄉下仔一邊讚嘆，再次異口同聲：令人好想去夜蒲！
要是真看夠了這段派對戲，戲內其他意大利的士高音樂也會立即補上，身體耳朵腦袋繼續轟隆轟隆，High爆如常，不會有一刻安寧。
看着主人翁的生日派對，我大概真的看傻了，冇經大腦的順口問：唔知羅馬啲人係咪都係咁狂野？
正如香港唔會一日到黑都有普羅大眾睇到的驚天動地警匪大戰一樣，羅馬亦唔會由朝到晚都依嘩鬼叫夜夜笙歌。
說來也真諷刺，戲內的派對華麗奢糜，其實是金玉其外，內裏虛假虛無，淪喪空洞，膚之欲出；但派對場面竟然也是最令人回味的部分 — 而且令人想去蒲！
我不得不捫心自問，自己和戲內手執酒杯，左搖右擺，衣着光鮮，胸無一物的空皮囊差異何在。
當然，令人着迷的，既是派對的狂野華貴，但更是美輪美奐的音樂和畫面 — 可能是事情本身，但更是電影。呀，尚能釐清電影和現實的微妙差別，原來自己並未病入膏肓。
說是想去夜蒲，也只是受派對場面打動，到認真幻想自己身處酒吧的士高時，興致九成九全消。身處酒吧舞廳，要不是酒精麻醉得夠徹底，又或跟朋友閒聊，飲飲吓酒搖吓搖吓時，看見其他人搖吓搖吓，竟然會想「點解會／要喺度」，真是Gambardella 跳跳吓舞企咗出嚟喺度的感慨。有時幻想，要是把音樂抽走，只看眼前人人搖擺的歡樂場面，大概只餘下愚眛（和好笑如Silent Disco）。要是酒精麻醉得夠徹底，興奮狂歡有如寄身於特定地方的鬼魂，只限當下當刻，一離開酒吧舞廳即煙消雲散，還會捲起一股黯然的空虛和自責，實在是得不嘗失。

（原本唔打算咁完，想接落寫對戲中其他靜啲嘅音樂之感，但實委拖到隔咗十個月，自己都唔記得寫過呢篇嘢，所以作罷。貼出來總比封塵好。想起戲中有如活化石嘅修女，突然開金口問主角：點解你唔繼續寫嘢？）