新奇的溫情

好些朋友總是有一大票親戚，一大部分的社交都圍着他們轉，着實令我這人丁單薄的小家庭艷羨 — 其實只因父親一幫全在大陸，母親一派則慣性疏離（但感情好！）（所以很想知點解！）。今晚難得有爸爸的遠房親戚 — 其實都未搞清邊個打邊個 — 由佛山來了，也就出了去吃飯。

因為場合太罕見，縱然是在平日三仔爺食飯的大排檔，也梳洗乾淨，穿戴整齊的去，算是給爸爸一個面子。也因為少跟親為吃飯，竟然有點緊張。

「乜你咁黑，咁後生就留鬚，學得你老豆咁」這位一來就叫得出我們兩兄弟個名，但完全唔認得樣的大叔坐了下來，一見面就這樣說。只能安慰自己，要不是穿戴整齊（自覺），第一句可能變成「乜你乞食呀」 — 冇咁刻薄，話晒成廿年冇見（！）。第二句，也如常是「細嗰個咁靚仔，咁白」 D : 齊人的時候，又補了句「大嗰個粗獷啲」 DDDDD :

他們一坐下來，據說全都是我見過的人 — 廿年前 — 可是我真一點印象都冇！樣子伶俐的姨姨說：「你呢，十二歲嗰陣嚟，講好多嘢，好識講。」乜同我對自己細個嘅木納蠢鈍印象咁唔同？總覺得她是作出來的。

可能是人大了（！），聽到上一輩的人講上一輩的事，總是有股魅力。以前爸爸在石硤尾街的地舖，每月賺個多少錢，搬極都係想住深水埗，叔叔（不好意思，未知正確叫法！）來了香港多少年等等，都是些平日聽不到的事。又例如，姑姐不懂煮飯，會用鹹蛋炒鹹蛋（！！！），此等十個趣的趣聞，也真只會在親戚聚會中出現。

另一些有趣時刻，是大家不斷追憶我們在甚麼時候返過佛山，我們又多大，一人一個版本，相互爭辯，又再扯出一大票不相干的家族史事，甚麼人在甚麼時候死，甚麼人在甚麼時候生，相互重疊，沒完沒了，想起來竟也算是生生不息。

坐在旁邊的佛山叔叔，也有教我這晚輩道理：「你哋喺香港聽到嗰啲嘢，可能會有偏差，咁大個人，要用腦消化、思考，唔好人哋講乜信乜。」晚輩受教。 說起法輪功：「嗰啲邪教，想反政府，個政府幾衰，都唔輪到你個宗教啲人去反，咁樣係邪教。」 又談起中國人的「民族性」：「中國人係要管，唔管呢，真係會好亂。」續說政府：「其實而家個政府唔叫好差，不過專制啲，一黨專政，但我哋又唔會好似朝鮮咁，網都冇得上，其實都幾自由。」爸爸插嘴說：「冇得上網，同早期中國一樣咁封閉。」不過，說起貪，佛山叔叔還是有些匪疑所思的事講：「一個市長，有九個副市長；一個局長，有十九個副局長。」心想，香港是否在向這個大方向發展？叔叔講古全程自動波，我看看他的臉，紅了，是醉了點。旁點的婆婆也勸着他別喝。

整餐晚飯，其實相當愉快。有親戚之樂算是體驗過了，但想起要是有一團親戚整日黏埋一齊，我還是喜歡淡薄點。

下次上佛山時再感受吧。

（速寫記下這新奇的溫情）