螄蚶

常聽到這個名字（但連正寫也得上網查），以為跟蜆蚌蠔蠣蟶子扇貝等有殼同類相差無幾，今週才在一泰國餐館得知，螄蚶細小殼白，內裏的肉卻是啡紅，味烈如生蠔，紅色的汁也分不清是肉汁還是血；食相稍欠美觀的話，倒真有滿口鮮血的原始。

當日未有趁墟攞隔離檯一隻嚐嚐鮮；事隔數日，和老爸睇完羅家英《戰宛城》後去打冷食宵夜，但見一大堆混着蒜頭，滿缸紅中一堆雪白，連忙問是否螄蚶 — 大 — 喜 — ！連菜都唔點就叫了一盤上檯。看見一碟白，問老爸如何見殼裏紅，以為乜騎呢嘢都食過的老爸也不曉。潮洲老闆笑笑口走來，話唔使出力，輕輕用手指推就得；一試，果真內裏腥紅即現。一開，一啜，也真有如出奇蛋般新鮮好玩。向來吃肉大塊的老爸，大概不慣這種小心眼的食物，也不再試開蚶；我就幫他開了，一隻隻排好。後面的幾位潮洲怒漢怒娘，只是哈哈哈哈的，看着這些客家香港佬一臉新奇的吃着。

夏至未到的凌晨，長沙灣已算寧靜的街頭，燈火通明的幾檯客人，看過大戲的悠然，還有桌上這碟螄蚶，另加兩枝送螄蚶的獅威（還是送獅威的螄蚶？），心足矣。

多謝螄蚶。