第一世界的七十二家房客

六時回家，房燈不着，以為燒燈膽。想開電腦，也都唔着。再試大廳電器，全無反應，方知整屋無電。

開門，甫見隔屋師奶，她的第一句是你搞咗啲乜。我心諗你乜春，口問做乜。再想，問佢屋企有電否。冇，她回。與此同時，四號室的住家爸爸出來，師奶問佢有冇電，佢笑笑口答冇，等吓囉，就落樓。師奶在終止對話前，拋下一句我以為係佢搞咗啲乜（註：即係本人呀）。

我一邊心諗隔離屋條師奶到底諗乜春，腳一邊落樓到管理處詢問。在電梯口見到另一名素未謀面，謀咗都唔記得嘅師奶。她一見我，就問我有冇電。冇呀，我答。住低一層的她答，冇喎。原來唔止我哋嗰層，真煩，我說道，企圖找個共同話題。可惜她沒有應。

落了幾層，進了個東南亞裔的家務助理，師奶向我出了個「哎喲，唔識點問佢有冇電」的鬼馬加尷尬樣。又再落了幾層，進了對同聲同氣的母女。師奶立即出招，母女答冇，東南亞裔家務助理轉身含笑，大家方知原來佢識聽。她說，係囉，又唔朝早冇電，而今先嚟，點煮飯，她盡責的嘖道。之後，每次開電梯門，都見到鄰里一二站着，互相問對方有冇電。

在聲聲冇的情況下，到達早已聚集了有老有嫩十數人的地下大堂。大家圍着盡責的管理員伯伯，伯伯語氣趕急，但樣子依舊可愛的打電話。大堂的人除了互望，也沒有什麼可做。走到大廈門口，又站了街坊十數，有股好想議論，但又冇咩好討論嘅樣。最活躍的，還是平日常常自然自語的大叔。大廈停電，為自然自語提供合理性，大叔也就開心的說個不停，逢人過就話冇電，是個勤快的情報員。有人不理，也有人說「冇電我都係上去㗎啦」，回應中帶着家園面目全非的苦楚，又有世上只有一頭家的忠貞。

有家歸來都冇乜用的還有我。我往附近走，才知大廈的地下舖位，一樣不能幸免。車房的哥兒們也只是小看點電視，多煲一飛煙，但茶餐廳的大姐則十分擔心，雪櫃內的食物因為過熱而凍過水，着擔負求救重任的管理員伯伯從速。我心裏卻更替街角的日本魚生店愁。一向受歡迎的印尼餐廳，食客沒有因停電而棄食物不顧，黑漆漆照食。最淡定的還是圖章店的伯伯，如常的坐在街外和師奶閒談。

回到大堂，十數人中好些易了角。有位看似高人的伯伯走近電錶，說只是跳制，一推即成。管理處伯伯義正詞嚴道，你識都唔好搞，萬一唔覺意卦咗咁點？旁邊拿着超強光電筒的肥白孫仔，一邊亂照一邊叫你唔好搞啦，等人嚟搞。我等後生一輩想法相近。 





住了十多年未遇的全大廈停電，令平日唔多見唔太睬的鄰里一下子相互攀談，未至於守望相助，也算同聲同氣。大廈忽然有種七十二家房客的況味，有種溫馨熱鬧的混亂，幾乎跟放煙花一樣。人們爭相歌頌的舊日屋邨鄰里關係，制水停電的滋養大概要記一功？ 





我趁這停電打鋪機，食個飯，回來，大廈外內無一人，除了剛回家不知就裏的西裝友。我知道，我又返回第一世界，富裕而疏離的電腦世界。