變髮之死

半年前，對剪來剪去都係咁的高額短髮生厭，心思思想變，就慢慢留了一餅頭髮。

頭髮稱得上一餅，卻還未想到怎用，就先行儲起，以帽蓋之，竟又成了個玩法，廟街買的百多圓草帽，一戴就變成身體一部分，而且連剪髮和每日落髮泥（又唔拖唔水）的金錢時間都一併省卻，覺得自己好醒，哈。

可是，帽總不能日日戴 — 雖然都維持咗幾個月！習慣養成只需兩週，一餅左撥右梳都覺異相的頭髮，一下子要以真面目見人，實在不太情願。而且，我也不想要回歸基本步嘅短髮，心想不如試試紥辮，該可玩好一陣子（ 而且連剪髮和每日落髮泥都慳番！）。

為了在佳節唔好太樣衰，日前終於的起心肝剪髮。髮形師看見我餅頭，問想點剪，相告紥辮之想法，留長。髮形師面色一沉，唔了一聲，叫我去洗頭。之後，剪着剪着時，他忽然說，你啲頭髮都甩得幾勁。





你啲頭髮都甩得幾勁。





之前每次跟人談起為漸少的煩惱絲煩惱時，大家都仿如法師，說我這位師主自尋煩惱，你睇，頭上咁多頭髮，要驚有排都未到你啦。自己知自己事，看見房間地上和洗澡後的廁所一地頭髮，就知事態嚴重，只是冇人講就冇乜理。

若果不是有人單刀直入，我好像不能明白為何現在前陰的頭髮，點梳都好似有啲問題。

與此同時，髮形師梳起頭頂頭髮，露出前額稀疏的幼毛，剖釋眼下這片荒土，只會越加貧脊，前陰間的空隙，左遮右掩都無用。

莫非在人人都說是男人黃金時期三十歲前，就已經要梳個現代清裝？

頭髮越是留長，稀疏問題只會越明顯，頭髮只會更易斷。最重要的問題，是頭髮再留都係咁上下，不會再長的了。所以，其實紥唔到辮。

變髮被判死刑。





早幾年的髮型，是一大堆陰精細地撥向一邊，遭一朋友戲稱為棒棒堂。我家陣先知棒棒堂和一眾嫩男明星出奇一致的棒棒堂頭，原來是青春的驕人展現 — 老嘢係留唔到㗎呢啲頭，老嘢！（撥髮、轉身）

曾經有一同事說起脫髮。他說，他不介意M字額，你睇吓，人哋阿祖迪羅都係咁，都幾有型呀。類近的說法，還有他不介意鄒紋，人哋阿佐治古尼都係咁，都幾有型。邏輯學真有必要成為必修課，下雨人會攞遮，不代表攞遮就是下雨；同樣地，人哋阿祖迪羅M字額有型，重點不是M字額而是人哋阿祖迪羅。當時，我想，呢位同事若果真有幸有個祖迪羅M字額，大有機會是人生中另一道敗筆。





小時候不懂何解頭髮叫煩惱絲，現在總算明白，如世上大部分事物一樣，都係有有有嘅煩，冇有冇嘅煩。

與其遮遮掩掩，不如堂堂正正。算，我會規規矩矩，好好留這個短髮。