如題。當然係第一次。而且唔係一個，係一隊。
咁大陣仗，難怪同樣等零晨三點船嘅阿姐，真心嬌問：「乜唔係拍戲咩？！」
零晨點幾兩點，大堆警察衝出立法會道，大堆警察衝上政總花園（不是可以集會嗎？），作人牆狀揮棒，係咁大聲叫「行啦！行啦！」
咁啲人就走啦，以為佢哋清咗政總就算，點知重落嚟金鐘去中環海濱長廊條窄路。咁警察就繼續推，我哋又繼續退。
咁行行吓，佢哋無啦啦就扯旗，話停止衝擊，否則用暴 — 係武先啱 — 力咁。為咗令警察唔好咁燥，啲人舉起晒手向後退，退退吓退到去摩天輪個位，點知嗰邊又係一堆警察，即係我哋俾人包抄。中環呢邊嘅警察又係圍成人鏈陣，揮動其棍，趕豬咁叫「行啦！行啦！」
咁我哋就去到摩天輪樓下，警察幾層護住去政總條路，以為完啦今次，點知佢哋突然間好似賽狗咁撲出嚟，幾個夾一個咁想扑啲人。我邊諗點解公眾地方都唔停得，邊走邊避。
入到九號同八號碼頭條窄路，警察繼續揮住警棍，叫我哋「行啦！行啦！」以真言回應者，換來更大聲的「行啦！行啦！」同真言。我拎住兩隻鼓，打咗成日，想慢慢行。有位警察見我咁樣，用較為平心靜氣嘅語氣講：「你行快啲，我唔想推你行。」我歎氣，衷心感激佢嘅貼心。
今晚天色好好，個維港同對面九龍都靜靜哋，係難得寧靜迷人嘅景緻。眼前嘅警察繼續叫囂，揈住條棍撲來撲去，我死狗咁黏住傳媒逃跑 — 有朝一日會唔會傳媒都扑？
警察終於覺得七號碼頭以外嘅範圍係公眾地方，唔介意俾我哋吹吓海風，就停低把守。我就如是者到咗返坪洲嘅六號碼頭。
其實，見佢哋咁鏈樣，我早已袋實張坪洲月票，諗住佢哋再唔收手嗰陣，就拎出嚟話：「我返屋企咋喎。」
阿姐句「乜唔係拍戲咩」好應景，因為着緊制服嘅係黑社會真係唔係戲。
後話：
警察喺七號碼頭企咗陣之後，終於同示威者一樣，坐喺樓梯吹風。大家都唔郁得，各自吹住一樣嘅風，睇住同一個海，大家嘅畫面都去返優美嘅香港夜景，好寧靜。又突然覺得有啲悲涼。
