竇娥冤

近年越來越愛看戲曲，而且要統計起來，觀賞戲曲的滿意率可真近百份百，就算是演出頗有紕漏的街坊盂蘭大戲，看完都覺上完一課文學／歷史／音樂／中國文化課，齣齣都是一塊寶。

有時會想，除了為着跟看似陌生，其實應該一脈相連的中國文化連繫外，到底在現代看這些宋元明清戲碼，意義何在？若戲碼跟時代不再能連繫，那什麼可滋養戲曲繼續成長？今晚看這江西省贛劇院的＜竇娥冤＞，好像有個答案。

戲曲的故事，總能三扒兩撥講完：竇娥爸上京赴考，將蔡婆賣給蔡婆做童養媳。蔡婆的兒子早死，蔡婆與竇娥二人生活，猶如母女。蔡婆不幸惹得尚算救過佢一命嘅地痞張驢兒父子，父子諗住老配老、嫰配嫰娶咗蔡婆竇娥兩婆媳，竇娥不從。張驢兒欲毒殺蔡婆，毒湯卻陰差陽錯的被張父喝了，釘蓋。張驢兒逼婚不果，就反誣竇娥毒殺張父，又到衙門行賄，令官爺唔理三七廿一施刑逼竇娥認罪。竇娥死唔認，官想用火刑逼蔡婆認，竇娥喝停，認罪，冤成，收監等斬。蔡婆賣屋上訪，但官官相衛，上訴遭駁回，竇娥都係要斬。臨死前，竇娥許下誓願，若真屬屈死，血將濺白練、六月將降雪、大旱將達三年，而且之後都一一靈驗 . . . . . .

戲曲的魅力，在於你明明一早知道晒啲劇情，唔知嘅亦會估到九成，但依然看得入神，而且仍然為啲奸醜角又奸又醜而憤，為竇娥蔡婆無辜被害而哀，戲曲這瑰麗的藝術形式本身，演員的投入和功架，皆功不可沒。看着看着，突然想，平民蒙冤，官為利亂判，恃權欺民，官的上頭互相包庇，官的下頭一同謀財，齊做大冤案 . . . . . . 這等戲碼，現代好像還是不時就有真人騷麼？那個官見到張驢兒行賄的銀兩，跪得比張驢兒還低，以及他一見竇娥就唔講理，一味用刑，看是竟是有點滋味，古今悽涼的連成一線 — 原來這不只是戲啊。

而且，竇娥這冤魂，等到阿爹做得成官返來伸個冤，阿爹第二句竟然又拿起尚方寶劍來，說竇娥敗壞列祖列宗清譽。家人在外頭受罰，自己人一定話咗先這習性真是百年不改。對苦竇娥更不利的是，疑點永遠歸於控方，被告得拿足證據，方能脫身。這官爸爸一直追問咁點解你嗰陣唔點點點，唔咁咁咁，他才知官場其實一肚黑，但仍不全相女兒的悲慘遭遇。最終令爸爸相信的，是竇娥應驗三個誓願 — 若果個天都聽阿女講，咁佢真係冤枉喇！及後，阿爹重審的第一句，就係同個官講，若果你無錯判，咁點解個天會咁呢。最後，將奸官和張驢兒入罪的，也不是什麼「實證」，而是竇娥誓言應驗的證據濺血白練 — 連個天都話係冤，你哋呢兩隻嘢仲有咩講？

看到此處，我心裏真「天呀」了一聲 — 乜若要打破這道德敗壞，官官相衛的死胡同，善良老百姓可以做的，不是鬧個革命起義，又或是提倡個政改經改，而是只可等天呀地呀鬼呀神來做公證。更不喜歡不少人戲謔的「中國人基因」之說，也不能不忖想，呢種冇乜可以做，做咗都冇用，等啲衰人畀天收的想法，是否仍然潛伏在廿一世紀的新炎黃子孫？

信天信地信鬼神，還不及信自己來得強。





江西省贛劇院＜竇娥冤＞，八月五日晚，香港大會堂。香港中國戲曲節節目之一。