長龍下圍村－家庭生活

二零一六年三月十日
晚上 堂哥家

昨晚十一時睡覺，今早調了七時起牀的鬧鐘，醒不了。雀和小孩都未能吵醒我，直睡到八時三十分，有如在香港。胡扯了一會出外吃早餐，印文件，回來和堂哥的三個女兒玩玩，他們開始和我混熟，大的兩個和我講小的佻皮事，看得出她們仨感情甚好。我總是沒有個長輩的樣子，對着這個堂叔，她們又是伸痢又是用公仔丟我，得出動阿嫂調停。和小朋友玩還是挺高興的。

我在堂哥家的活動範圍慢慢進入客廳。同樣地，堂哥原來會用我房中的電腦玩接龍，大概是頭一兩日不好意思。我着他留在這裏玩，他還是見到我回來就走了出去。 總覺得在堂哥家，因為我有自己的房間，也因為他們是自己一家人，我很難謬然走出廳和他們玩，特別是晚上堂哥回到家的時候；可能他們也覺得我總在做着些甚麼，不便打擾。混熟了後，堂哥細女成日喺門口𥄫我，見我望返佢，佢就好開心咁走開，可以重覆玩十多次。阿嫂見到，就會用客家話話唔好搞叔叔，叔叔做緊事。細女難得講到一句完整句子，問「叔叔做甚麼事」。阿嫂吱唔以對，重覆「做事」兩字當答咗。其實，有時我也不知我在幹甚麼。

下午要去隔離常平鎮辦格魯吉亞簽證所需的代辦文件（有夠麻煩的！），上網查過後，知道搭乜車去到，阿叔都係唔放心，不斷提你係咪識路，使唔使包車呀咁。他也開始叫我俊仔，大概未結婚的人都是「仔」吧。常平的車搭了一個鐘，來回都打了盹兒。今日冷鋒至（家陣三月！），又落水，很冷很濕。公證處的人比想像中爽快有效率得多，一小時候手續已辦妥。常平鎮比長龍繁華得多，和大陸其他二線城市沒有區別 — 不能區別。

晚飯時，阿叔問我香港年輕人食飯係咪都咁慢，我話我唔使快就唔會快，佢話你食飯咁慢，點喺工廠上班！後生仔食嘢要食快啲，唔好好似 —— 停咗。叔母在笑。我不自覺地解釋，話自己五點食過嘢，所以再慢過平時，其實根本唔需要解釋。 佢又拎枝「摵蜂」酒（蜜蜂酒）出嚟，同叔母同我一齊飲。這個有蜜糖味，也有蜜蜂浸（要用BB蜜蜂！），好入口。飲晒一杯後，阿叔問我飲唔飲多杯，我飲開就想飲，話好，但原來阿叔冇諗住我會話好，好似有啲錯愕，話我要食中藥，唔好飲咁多酒。

堂弟婦炖雞湯，上去沖涼後坐陣又食過。今日先知堂弟婦係梅州人，立即同佢講自己上年都有去過梅州旅行，又傾煲中藥同炖湯嘅嘢。她又給了我件梅州特產欖仁榚，我說謝謝，這也算混熟了。不過，她叫我做「阿哥」總覺得很奇怪。

回來後，堂哥一家除堂哥以外均已睡，我看了點書也睡覺去，和在廳獨自煲煙的堂哥說「早抖」 — 我同佢每日都講，亦都係差唔多唯一一句話。

這是我的 家 庭 生 活。