五月午後天水圍

若非工作緣故，都唔會無情白事走入又遠又冇嘢做嘅香港西北角落。冇天冇水畀樓圍，街上了無生氣，度度一色一樣是第一印象。

去得多，發覺呢度空氣清新，周圍綠油油，啲人同條街都冇初時印象咁死氣沉沉，接觸到嘅一班中學生更是開心可愛有幹勁，區內街坊亦係一樣。

五月下旬午後，踩單車遊天水圍，風光好明媚。見到天澤同天秀，掛了長長數列棉被，五顏六色綻放，為單調嘅街添咗個性人氣，甚美。除咗曬被，重有人曬鞋曬果皮，都是生活生氣，都可愛。

然後，看見公園內阿伯阿嬸看河釣魚吹水捉棋，個個悠然自得，都令設計得未夠靈活嘅公共空間物盡其用。

睇嚟重有好多嘢發掘呢。