摺埋啟示錄

不論企定定坐定，她都愛引導說：吸氣，拉長脊骨後頸；呼氣，沉個上半身落去。如是者，上半身黏近下半身，整個人摺埋。隔了一會，她一定會說，再吸氣，拉 — 長脊骨後頸；呼氣，睇吓上半身可唔可以再沉 — 多少少。她說的「吸氣」都是高音，「吸」字發音像真的吸了些氣進去，「長」字聽着舒適地拉長，「沉」字壓低聲線後停頓，「少少」是兩個輕快跳躍的高音 — 和理應的動作一樣。說得輕巧，她也做得優雅，其他人做不做得到卻是另一回事。

能夠如此巨細無遺的形容她的一字一句，是因為原來我已跟了這位老師學瑜伽一年有多。而將人摺埋是差不多每堂必做的，分別除了是企定坐，就係隻腳企幾開，坐喺度雙腳又點擺而已。

做過的都知，伸直雙腳摺埋睇落冇乜嘢，其實難度高好多，皆因腹部左右兩塊小小唔多覺眼嘅肌肉就要出多好多力。雖然咁做才是更上一層樓，但每次摺埋都唔覺意俾自己懶，輕輕曲咗膝頭。慢慢為意，努力令膝頭伸（舒適地拉長）直，但上半身就會彈起，摺得冇咁埋。強行扯到個上半身落去，也都不是用那兩塊唔多覺眼嘅「Core」。有意無心的放軟，雖然摺得埋，也其實是有其形而未得其實，亦是太放過自己了。特別是毛蟲式，每做雙腿總是震震吓，不斷用膊頭同頸力扯個人落去。自己知自己事，不等於有能力改進，反而是無助的跌入無底深淵。

有次又摺埋，老師走埋嚟，輕聲說：你嘅身體要習慣畀雙腳伸直。她的話，有如洪鐘，把懶惰偷雞的我敲醒。自此以後，我不敢待慢的做這些摺埋動作，認真做起來，也就不太輕鬆，甚至比一些看來難度甚高的動作更磨人，因為有得揀做錯，有得揀做錯是心魔。是可惜也是情理之中，有時我還是不自覺的沒用力伸 — 直，甚至不自知。

這時，老師會走埋嚟，輕聲說：你嘅身體要習慣畀雙腳伸直。

有如洪鐘。

我還在努力。但我記住，學了瑜伽一年有多，我嘅身體要習慣畀雙腳伸 — 直。

是時候要進步了。