講個信字

個個都話要投資，放喺度只要越嚟越唔見使，買乜都好，簡簡單單買外幣，叻啲買吓股票窩輪，揑幾手匯豐，長線擺實賺。雞乸隻腳趾甲咁大隻字嘅條款，一大堆成份風險數據名詞，隻隻字都識但加埋一齊唔知做乜春，經紀講完一大餐都係發緊夢，結果講咁耐都係講個信字，人人都係咁買我唔買咪好笨實？銀行強積金寄嚟嘅信近乎密碼，睇晒成份都唔知係賺定蝕；不過，放心，學人話齋：長線擺，賺梗嘅。今日呀咩拍晒心口話樓價只會繼續升，聽日呀咩話邊隻股值得諗諗，身邊總有一兩個人講到自己投資乜都識乜都賺嘅能人，跟佢哋，冇死嘅。
有得賺，又點會冇諗過投資呢。只係強積金同十年前買落嘅儲蓄基金已經夠煩， 日常生活已經夠多濕碎嘢阻礙正經事，所以硬係的唔起心肝去好好投資吓。正所謂：長線擺，賺硬。我唔想一日到黑睇住啲金呀油呀美金呀外幣，然後心情跟嗰條忽高忽低嘅線時高時低。經濟我睇極都唔明，有人可以答我以前文化研究老師問嘅一條問題：世界嘅資源係咁多，用盡就唔會再有增長，點解經濟重可以不斷有增長？樓市點解可以升極重有？中國嘅發展換咗一大堆唔吸得嘅空氣唔飲得嘅水同食壞人嘅食物，呢個係咪增長極都重有嘅原因？ 依稀記得嗰時同舊老細做網站，佢話唔相信YouTube，因為可能有朝一日會冇，放喺自己度穩陣啲。確實係唔知頭唔知路，但又冇佢咁好氣嘅我，隱晦話想像YouTube執笠，就好似想像互聯網會冇咗，又或者網上理財失效咁難。老細知我咩意思，乾笑咗一下。而家諗返轉頭，又係咪真係咁難以想像？呢啲係咪叫太龐大，所以唔會死（滔壁吐飛傲）咁樣？過咗幾年，我終於多咗啲啲舊老細嘅懷疑。
好似而家呢篇嘢咁樣，我信谷哥仔會儲存得妥當，重妥當過手寫落本簿仔然後唔知去咗邊，所以我冇留底。但係，谷哥會唔會有一日真係瓜柴，就好似以前萬人空巷嘅猩加咁樣？到時，我又點樣搵得返呢啲嘢？若果面書死咗，我會唔見好多珍貴嘅相，同埋唔少剩係得面書聯絡嘅人。
呢套戲令我心驚嘅地方，係人（包括我自己）對龐大系統嘅信賴，同埋個個都做自己唔做好蝕嘅諗法。所謂嘅沽注，係因為大部份人都唔睇真啲，諗深一層 — 再次包括我。喺睇呢套戲之前，我的確打算要玩下講咗十世嘅投資，但真係乜染都唔撚識。我會好似戲入面嗰啲盲目樂觀笑笑口，睇落無辜其實無知嘅眾生一樣，死咗都唔知咩事。唔知頭唔路追追追，呢啲其實先係沽注一擲。呢個不斷膨脹嘅金融投資市場，其實係點樣煲出嚟。身為經濟白痴，呢種深入淺出得嚟又算生動嘅說教當然好受用；但我環顧上下左右前前後後真真假假，都有太多大到只好信任佢哋嘅嘢，例如電訊公司，例如電郵，又例如東江水。其實，睇完套戲後，我覺得如果唔可以篤穿所有呢啲藉人嘅信任／懶／跟風而為所欲為嘅嘢，其實可能同戲入面紫醉金迷死到臨頭都唔知嘅傻瓜蛋一樣。而零八年金融海嘯證明，傻瓜蛋係大多數，作惡嘅小數總有辦法走甩（而且捲土重來！）。
但係，講完一大餐，我都唔知可以由邊度做起。可能第一部係放棄用嚟打呢篇嘢嘅蘋果電腦。