星星之火

凌晨四點半，由銅鑼灣CEO到九龍的過海的士。司機主動聊起來，說我好清醒，唔似唱完K，喺咪返工。我話唔係，有飲少少，打完麻雀。他說打麻雀好玩，又話其實唔中意唱K，唔明有乜咁好唱。我認同說，我都唔中意唱。話峰一轉，他說佔中嚟緊喇喎。

有一日落街食早餐，樓下茶餐廳那個女人如常咬字清晰，但有種總是着皺眉，撐大鼻孔的煩人聲線，喋喋不休的說話。她也是我不太喜歡去那茶餐廳的原因。

她看着電視上幫港出聲的獻花活動，一邊說佔中真係殺到埋嚟喇，真係好驚㗎大佬，冇生意做點算呀，搞到香港咁亂做乜呀，人哋都講咗話有得普選，就唔好搞咁多嘢啦，咁唔通大陸會畀你泛民做特首咩，有得選啲人都唔會支持你啦，人哋北京唔通會畀個同佢唔啱嘅人做特首咩，好似你一間公司咁，邊有老闆會請啲同佢唔啱嘅員工呀，人哋北京有大把錢大把人，你哋點夠佢哋玩，再搞到咁亂真係唔得掂㗎。茶餐廳其他員工也出聲附和，各有高見，一時間鬧哄哄得有如以維園阿伯為嘉賓的城市論壇。

我安靜地讀我的蘋果日報，吃我的燒鵝瀨，但他們每一句論調，都像一對對筷子插進我雙耳，直穿進身體，發出某些東西跌落深谷碎裂的聲音，有時又像喇叭失靈的尖刺單音。說着說着，這個說話像把鼻孔撐得塞得進一枝雙頭筆的女人，瞄到我和我的蘋果日報，似乎有點想邀請我也講些高見，我裝作看不見。將心比己，我覺得我真心的想法，對他們來說是污染，就如我當下覺得被轟炸一樣。要是我說出自己的想法，只會換來更多的污染，甚為無益。

這不是個別例子。在餐廳吃飯時，總有那麼一兩檯的一兩個人，熱烈的譴責佔中，高聲疾呼有之，拍檯拍櫈有之，但都彌補不了空洞短視的內容。他們的說話好像毒氣，慢慢的透過耳鼻喉，癱瘓思緒。每每見到這些人時，我都極力躲避。

但要是在同一輛的士上，就避無可避。我敷衍着問甚麼時候，要開始了嗎這種完全沒有立場的說話，他也開始談他的想法。他說，而家香港真係大鑊，咁樣選同冇得選冇分別。我說，我認同你的講法。

我心裏鬆一口氣。要是司機是反佔中，我就真的在睡前再被轟炸一番。原來，因政改而生的「撕裂」，是這麼實在，決定一個人能否跟好些善良的人好好談話。又原來，街上的路人還是有很多人和自己想法相近。

但的士司機總是有種我不知如何反應的火氣。他說，泛民而家咁樣點得，冇個領袖，點帶領啲人抗爭；又說，佢哋一九八四年嗰陣加排油費，啲的士全部走晒出嚟抗議，政府即晚撤銷，要個個走出嚟咁樣先可以。而家啲人抗爭，得個傾字，都唔行動，咁樣點得，人哋都講到出面，都重唔郁，都冇乜可以點，香港遲早冇。他越講越大聲，大有種恨鐵不成鋼的憤恨。我理解他的憤怒，也有點認同，卻如常的不知如何反應。

喺前面落得喇，我說。好，多謝你，司機說。平靜的找續過後，我拋下一句，有火就唔好放棄。我直走出車外，聽見他竟然有點天真爛漫的笑聲漸遠。

對，有火就唔好放棄。