五枝權杖打交叉

 

自盤古初開，無線劇集中，有幾多pair（睇落）好地地的情人（有其中一個應該係主角），因為其中一方要去外國做嘢/讀書，引發好多問題，糾纏咗一陣之後雖然分隔兩地，仍然藕斷絲連？當中又有幾多留低的傷心人慢慢走出陰霾，同另一個角色（通常一開始狗咬狗骨）漸生情愫嘅時侯，喺外國嘅舊情人返咗嚟想修補關係，引發更多問題？

呢啲好多問題嘅感情線，廿集入面至少可以玩到十集。我一直都唔明，點解電視要成日有呢類情節：乜真係咁常見嘅咩？

〈鐵達尼號〉沉船精彩刺激，解鎖槍擊水浸跳樓機同浸冰水冇停，表現手法同戲中個nerd用3D動畫講解沉船原理時慷慨激昂相差無幾。現實嘅沉船，應該無乜娛樂性，多太多難以言喻、欲哭無淚嘅哀苦。

咁愛情/理想-事業兩難嘅劇情，又同現實有咩分別？

（一）未必大悲大痛，哭哭啼啼；

（二）多好多思前想後，左搖右擺；

（三）冇話留低嗰個慘啲，離開嗰個衰啲；

（四）除咗放低理想做對（劇集歌頌）平凡又幸福嘅情人，或者分開各自各精彩外，中間同前後左右都有好多選擇；

暫時諗到呢四個，隨事態發展應該會加入更多。其實，十劃未有一撇嘅時侯打呢場交，又真係十分之咁無聊。最慘係真係俾呢個無聊所困。

臨尾補多飛：（五）睇戲評頭品足，當然容易得多。