「而家喺粉嶺搭去觀塘又係十幾蚊，搭去荃灣又係十幾蚊，鬼死咁貴。」阿全看着窗外的景色，和身旁的朋友談起現居地的變化。「澳門搭車始終抵過香港。」可能是唯一的不變之處，有點理所當然，說了好像沒說般。
阿全又看看車上的乘客，似乎不是這小島最勿忙的上班族和學生，也不是來淘空澳門的遊客。他覺得，眼前光景和回憶中的澳門，還未至於面目全非。可是，這樣的想法，又令他自己覺得自己有問題 — 咁都唔算變得犀利？
到了提督馬路站，巴士上的人開始多起來。在上上落落的面孔中，阿全看見這多年不見，還是一眼認得的舊相識，獨自一人坐在單邊位上。
喂，阿全向他叫了一聲。
啊，是你，我認得。阿貴定過神來，回道。
係呀，好耐冇見，二人同聲說。
你退休未？阿全問。
就快喇，做多兩年先啦不過，唔做嘢硬係周身唔聚財。不過而家想做都未必有得做就真，阿貴答。你退休未？阿全反問。
退咗喇，一二年退嘅，而家間唔中就過吓嚟玩幾日囉，搭程船，好快，阿全答。又道，我想做都冇得做啦，不過啲仔女都大晒囉。
阿貴無聲的點頭。阿全見沒有回覆，轉身向後望，才知阿貴應了。
阿全又說，八八年走咗之後，喺香港攞咗身份證，又揸澳門身份證，重幫啲仔女攞埋澳門身份證，兩邊福利都攞。
阿貴說，好呀，有錢派，兩邊都有得攞，又多福利。
巴士到了沙嘉都喇街。車上有個學生大聲在電話上數落老師，拉高巴士上的聲浪。
阿全說，澳門都變晒囉可。
阿貴答，變咗好多，唔同晒囉。
阿全說，以前做廠嗰陣，你咪跟阿邊個嘅。
阿貴答，係呀，死咗喇，佢重大我十年。 阿全問，咩事死。
阿貴答，生Cancer。
阿全回，都係冇病冇痛好呀可。
阿貴答，係。
阿全問，你今年幾歲。
阿貴答，六十二，你呢。
阿全答，大你三年，六十五。
阿貴答，哦，差唔多。
阿全說，咁你有冇搵呀邊個，以前同呀邊個一組嘅。
阿貴答，我知你講邊個，不過我唔係同佢哋一組，唔係好熟，不過聽講生意都叫唔錯。
阿全說，你記唔記得呀邊個，同咁上下過咗去香港嗰個呢。我同佢間唔時去拱北嗰邊飲茶，俾我哋撞到佢。
阿貴答，係呀，佢好似返咗珠海嗰頭住，買咗棟樓，都好好景。
阿全說，咁就好喇，最緊要有得住有得食，以前做到隻積咁都係為咗咁啫。
阿貴點頭。阿全沒有聽見回覆，但知道阿貴其實回過了。
望着一直繁榮的水坑尾街，阿貴說，而家啲嘢貴咗好多，特別係新馬路嗰頭，鬼死咁多人，都唔係我哋去嘅。而今喺高士德嗰頭多。
阿全點頭。他有點想說說香港的情況，但難得阿貴開口，有點想順着他閒談，講講澳門。和澳門故友談澳門，該是在澳門做的一件好事。
新葡京站上了一批遊客。
阿全笑問，重有冇去玩？
阿貴也笑，說，冇喇，我哋做呢啲，以前最鐘意玩兩鋪，一經過又玩，廠冇嘢做就去，都唔知輸幾多畀佢哋。又問，你呢。
阿全說，哈哈，咁忍得手。而家都係玩一兩鋪咁啦，過吓手癮，唔會輸身家。
阿貴說，以前阿邊個咪係囉，玩晒成個月糧都有，真係。
阿全問，係喎，咁阿邊個而家點。
阿貴答，都冇聽到阿邊個點喎，都失晒聯絡，若果唔係好似我哋咁撞到，都冇機會見，傾下偈囉。
阿全笑答，係囉，真係好呀撞到你。 阿全又問，你喺邊落車？
阿貴答，新馬路呀，你呢？
阿全答，我哋都係喎，點都要去吓嘅，去睇吓又變成點囉。
阿貴又只是點了一下頭。這次阿貴和阿全都站了起來，看得見他點頭了。
阿全說，咁你去新馬路做乜？
阿貴說，約咗朋友。 阿全說，啊，好呀。
巴士經過新馬路站，但沒有停車，繼續向前行。
哎呀，做乜唔停㗎。阿貴說。 係囉，點解唔停㗎，過咗喎個站。阿全說。
阿貴笑了，說，掛住講嘢，唔記得襟制㖭。
阿全也笑，說，係囉，我又以為你襟咗。
阿貴說，哈哈，我又以為你襟咗。大家指意大家。
阿全說，哈哈，咪就係，真係。不過，我又以為新馬路一定有人落。
阿貴說，係囉，新馬路通常一定有人落車㗎嘛，今次竟然冇。
阿貴阿全都笑而不語。
阿全問，下一個站喺邊。
阿貴說，要去到十六浦喇。
阿全笑了，說，使唔使賭番兩鋪。
阿貴也笑，最尾都係載我哋喺呢度落，可以去玩喇。
阿貴阿全都笑而不語。
阿全說，既然係咁，我同朋友喺十六浦行吓。
阿貴說，都好，行吓囉。
巴士到達十六浦。華麗的索菲特大酒店，好像不能穿越的舞臺佈景。
阿貴說，再見。
阿全說，再見，再見。
二人往相反方向走，頭也不回。
在十六浦下車的，還有一位也指意阿全阿貴會在新馬路按制下車，所以也沒有按制，然後一起錯乘至十六浦的香港遊人。
沒有留言:
發佈留言