長大成人

當講求效率乜都要快嘅香港，主要幹道都要讓路俾內心憤怒而堅決嘅市民，確實震憾同感動。香港人一洗平日功利現實又細膽嘅形象，裏頭嘅人雖則憤怒，但比平日更風度翩翩，話係示威但井然有序，互相愛護兼夾愛護環境，比平日街上面逼到實一實，但又冷漠疏離好不知幾多倍。其實，我一直打定輸數，拖泥帶水嘅佔中，佔極都係得個樣，到講到口嗅嘅嘢生咗出嚟，重要生到出嚟咁正咁靚，化為人人有份嘅遮打運動，真係振奮到不得了。錦上添花爆多咗個旺角同銅鑼灣，絕對有平分春色之勢，區區各有睇頭各有可愛。先前兩大旺區可避則避嘅人多擠逼抖唔到氣，直頭係有復活嘅神聖，光復嘅喜悅，心想有幸見證此景，先算喺香港活過。佢哋有如啲啱啱出世嘅BB，時時刻刻見都有睇唔厭嘅可愛，新增嘅橫額帳蓬就係佢哋嘅一條新頭髮、一隻新牙，每樣都充滿朝氣，覺得佢哋好快就會大個仔大個女。

呢個美好嘅幻象，一直維持到上個禮拜五。原來生得好地地嘅BB，可以畀人無端白事，卑劣咁掐一下、鋤一下、扑一下，新生出嚟嘅頭髮扯斷，牙齒脫落，不似人形，有個營養不足嘅么折咗。大家見狀，又一個一個走返出嚟，好好保護新生命。更磨人嘅可能唔係實實在在嘅明罵暗打，而係空穴來風未必無因嘅謠言，一次一次覺得自己就快要為佢哋犧牲，一次一次覺得自己被欺騙，但亦只能寧可信其有。幾攰大家都要坐喺度，感受或明或暗嘅各式攻擊。真係攰到要返歸，又硬係心掛掛，第二日起身第一件事，就係要睇睇面書，確保寶寶安然。的而且確，近日只要得閒，係冇理由唔去探佢哋。就算唔得閒都要探，可想而之佢哋嘅地位，就好似要去朝聖咁。

尋日下晝，我驚星期一人少，走咗出去。由金鐘地鐵站C出口一出，我已經好習慣行出去就係行出大馬路，好習慣呢幾個地方係行人專區，好習慣呢度好似另一個香港。或者係慢慢長大咗，雖然每次嚟都一定有新發現，但之前嘅震憾慢慢化為日常生活嘅一部分，雖然依然持之而行，但有時又覺得做與不做，其實可有可無，大概有啲似返教會，喺一個所有人事物都肯定自己深信嘅事嘅環境，聽得太多做得太多自己深信嘅事，過分強調反而顯得有啲唔可信，開始有啲模糊。有時，呢度又有啲似公園，喺秋風同柔和日光下，坐住享受生活嘅人。當然，呢啲都係政府拖字訣之下生出嚟嘅假象。

我而家坐咗係夏慤道匯豐對出嘅嗰條壆度，睇住夏慤道上金鐘嘅天橋，嗰條成日夜晚搭車過九龍會經嘅天橋，有疏落嘅人向兩個方向散步緩慢咁行，除咗「示威」嘅一群，都好似有唔少放工嘅人，打一條舒適嘅行人路回府，細心睇吓一座座高樓大廈同天橋，同埋中間嘅天空其實係咩樣。又有數個飲得略醉嘅西裝友，喺條馬路上嬉戲。

坐喺夏慤道嘅中間，先知原來夏慤道嘅西行線比東行線高咗唔少。當夏慤道去到政總出面，成條路嘅最高點係中間，西行線同東行線都斜咗落去，所以最好嘅坐法一定係靠住個駁，雖然硬係覺得啲嘢會跌咗出去。

我好努力咁撈喺個池入面最深而最中嘅想法，但硬係撈唔到，只能捉住橫節末節，亦只好如此。我真怕我唔記得嚟呢度嘅原因，而唔係為做而做。我亦記得我同自己講過要堅持，堅持係行動，更係心態。

佢已經唔係BB，冇得期望佢日日都咁可愛，咁有驚喜，咁大上大落。但佢都係要養，要照顧，先至會長大成人，先至會自立門戶，先至唔使我哋掛心（雖說長憂九十九）。到時，就係我哋靠返佢轉頭。