重頭來過

「You are not listening.  That’s why you can’t do it.」老師以沒好氣的口吻說道。我的本能反應是說「sorry」。這「sorry 」除了是向費心的老師道歉，更是「sorry for myself」。

這個手支撐的動作，我從未做過，也覺得自己不會立刻做得到。覺得做不到，自然就會做不到，所以也就以點都唔得實跌嘅心態做。老師輕輕托起我的腳，說了些指引。我其實一句都聽唔到，只是一味諗住做唔到，似是想去做，其實是在胡亂掙扎，和身體無謂搏鬥，是身體的內戰。

這挫敗感，好像有團火在心臟燒似的，而且維持了一整個下午。在街上想起那句「You are not listening」，還獨自嘆氣嘆出聲。

報讀瑜伽導師班，只是覺得自己雖然練得不密，也總算學了四年，是時候該進步。暫時過了一個月，學到的東西的確多，理論脈輪式子均有進益，但挫敗的感覺亦不少。坦白講，之前覺得自己瑜伽還算可以，現在只是明白自己有幾多不足，特別是力氣，倒轉呀手支撐呀都唔夠力做，所以驚。

另一個狠狠的挫敗，是上個禮拜上了一堂核心肌群瑜伽，以為自己平時得閒就做三分半鐘平板式，點都唔會太差，點知做到最尾全部動作都做唔到，已經筋疲力盡。同班四位女士，個個好似應付自如，重有一個有咁上下年紀。雖然我知唔應該比，但嗰日的確有點沮喪，差唔多覺得自己好似冇學過瑜伽咁。而家再見到核心肌群瑜伽，即使唔係同一個人教，仍然有陰影。

而近日感到「好似冇做過」的東西，也不單只是瑜伽。似乎很多以為做得還好的事，都覺得不外如是，有些甚至只有模糊的挫敗感覺，連那個問題是甚麼也講不清。

今個月壞掉、唔見的東西多得很：上網、電腦（是自己白癡所致）、錶、水壺（因為飲水多，對我來說很重要）、太陽眼鏡（戴過唔夠十次！）、電話等等等等，單是處理這些問題，已經費了不少無謂的時間和力氣，而且總是覺得個人呢度崩嗰度崩咁，個人硬係唔得完整。有一刻，我真係諗係咪風水定乜嘢出事。

在這種運氣欠佳的情況下，我又想起麻雀。運氣不好時，要守，不出沖就當驘，要沈得住氣。

近日缺錢，使費也就比以往節儉。沒有委屈自己，但節儉時才知道自己真正需要的東西，比想像中少得多，人也因此輕了。這感受不錯。

就像冥想，聽聽身體裏面的聲音，觀察一下這狀態。