機都未起

週日一早攞衫落街洗，老闆娘話，八號風球喇！未食早餐唔上網，屋企又冇電視，連打風都唔知。又話，啲人去晒惠康度掃貨，驚冇嘢買！惠康就快閂門喇！

好彩屋企糧食尚算充足，捱一日不成問題，沒有失魂落魄，也就求其喺菜檔買啲菜。個個一見面，就話「打風喇！」亦有老街坊見人就話打風，也真有舖頭老闆作懵然不知狀。喺島度，人肉天文台，似乎比電視機收音機互聯網更有效率。街上瀰漫一片語帶興奮嘅緊張。

慢麼麼行返屋企，準備迎接住入坪洲嘅第一個颱風，將櫈摺起，將露台植物同地氈收入屋，隔住玻璃賞風。以為靜英英是風雨欲來嘅先兆，卻越嚟越靜，最尾連雨都收埋，風都冇滴，我重可以坐出露台食晏。結果，風掛咗四個鐘就落波。

又落街，街上嘅空櫈已有叔伯姑婆聚集，係八號波已過嘅鮮活證明。單車又開始左穿右插。有個大哥撞到另外兩個大哥，講話咁快落咗波囉喎。兩個大哥話，係囉，快過打飛機呀。大哥回話，咪就係，機都未起㖭呀。三個大哥對弱風嘲弄一番後，哈哈哈大笑散去，豪氣得好似係自己驅風有術。