2017年2月23日星期四

求求你囉




人家好端端的問你食唔食嘢,為何會令人厭惡?

起初爸爸常讚她煮嘢好食。比起母親的款少味寡,這名女朋友手藝的確不錯,雖然好肉,太鹹,而且會落味精。為了示好,我還是讚了她好幾回,不知她分不分得出。

後來,她終於進駐,初時說「屋企點都有個女人好啲」。另一樣她比母親強的,是她樣樣做之餘,還無一絲埋怨,還要返街市賣菜工,幾近唔係做嘢,就係做屋企嘢。有時我見她返咗成日工重煮飯,重要洗碗,我都忍唔住話要洗,但遭一口拒絕,說是「做慣囉」。我自愧不如,衷心敬重。

上一代的人,是否總喜歡叫人食嘢?要是一起吃,她總會煮出遠超眾人上限的份量,然後整餐在說「食多啲,唔好嘥」— 喂阿姐,唔煮咁多咪乜事都冇囉。後來,阿姐也發現漏洞,自言「慣咗手勢,改唔到」,傻笑一下。Cute係cute,但唔係大晒。浪費已經衰,逼人掛上「浪費」罪名,罪加一等。今個禮拜有次食飯,阿姐還半嬌嗔半認真,強行灌細佬一碗湯,說:「幹幹,飲多啲喔!唔好嘥喔!」我頂。大概眉頭鎖得太深,老豆見狀也出言阻止,但阿爸條女逼人食嘢嘅惡習,實在根深蒂固。

一齊食都還好,唔係一齊食重煩。說真的,在家要不是食飯,我都做自己嘢,不喜打擾。「食咗嘢喇」幾隻字講得幾咁字正腔圓,幾咁聲如洪鐘,佢一樣當耳邊風,問咗食唔食飯,可以問食唔食條粟米,飲唔飲碗湯。我頂,你當我是豬嗎?現在,我學精了,吃過東西回來,見她們一檯餸,就先聲奪人說「食咗嘢喇」,好等她知難而退。但阿爸今日竟接力說「整碗湯飲」,我忍住,深呼吸一下,重申「食咗嘢喇」,但語氣已經不再溫和。

逐漸地,她每次叫我食乜食乜,我都本能地厭惡、拒絕;甚至每次見她在煮東西吃,又或是一檯餸,我已經無名火起。

有時我回想,覺得要找個機會,跟她說「我想食會自己叫,同埋我剩係中意將啲嘢講一次。」我真希望用不着出到這招。

我也會為自己動氣感到無謂,但人越近,細眉細眼的事就放得越大。她現在也是半個家人了。再想,要是她和爸爸不問我食唔食嘢,叫我食多啲,我們的來往就更少了。現在食飯,都是他們倆談話,我在一旁靜靜吃,看看電視,聽聽他們說話。其實這樣很好,別再叫我吃東西叫到我𢛴,求求你。

沒有留言: