有一少部分人，飲咗汽水都唔會打嗝。但大部分人都會。
雖然唔禮貌，但氣喺肚度，難忍，只好打嗝，雖則樣衰，但亦算爽快。
忍住唔打嘅，牌面高幾皮，自然可以蔑其他人打嗝。
你咁渣架。要多加練習。影響到其他人。好肉酸。
呢班打咗嗝嘅人，對忍得者自然心生敬仰。
但肚入面啖氣唔上唔落，啞子吃黃蓮 — 重要係自己扮啞，難受呀。
唯有連自己都呃埋，再好豪爽咁啪多一罐。
肚內氣體充沛，由鼻哥以外嘅所有窿洩漏，整個人冒煙。
打咗嗝嘅人覺得奇怪，較靈敏嘅睇得出有事，飲極都唔會打嗝嘅人，更加一早睇穿佢其實扮冇氣，其實一肚氣。睇得出係道行。
之前敬仰嘅人覺得受騙，特登叫咗消防員嚟睇吓乜事，篤爆佢。
氣不停冒出，佢索性哩埋，眾人四處搜索，不果。
從黑暗處冒出濃濃白煙，眾人趕至，但見佢面色發青，雙眼反上，口吐煙縷不斷，腹部青筋現。
送院治理，傻事人盡皆知，成為一時笑話。
人曰：人人都有打嗝嘅時候，佢咁忍有乜為呢，陰公豬。
佢終於醒喇。心都醒埋。佢決定，唔再飲汽水。其實，佢一開始就唔中意飲，只係人飲佢又飲啫。
你哋都唔好飲喇，有汽嘢飲咗打嗝！佢成為反汽水鬥士。
除咗一兩個同道之士之外，大部分人都已習慣飲完打嗝，唔敢唔繼續飲，因為唔飲唔知可以飲乜。
又有一兩個人，竟然真心中意有汽飲品，甚至中意埋打嗝，覺得係捱得苦嘅象徵。
鬥士諗：佢哋同我一樣，都係真漢子，坦盪盪。
鬥士話：若果唔係真正受得住，真正中意飲有汽嘢嘅，點解要飲，點解會作賤自己呢？
鬥士話：人民們，站起來吧！
眾人迷惘，不敢從。
佢哋都唔知自己想點。中意唔中意，唔識諗，講唔清，雖然都覺得唔係路，但又唔知可以點，更怕人做佢唔做，蝕章。
鬥士話，聆聽自己嘅內心！
鬥士話，問吓你自己想唔想飲有汽嘢！
鬥士話，呀！呀！呀 — ！
（待續）
沒有留言:
發佈留言