2011年8月29日星期一

飯成

踏入二千有十一年,終於體會無住家飯吃之苦。餐餐出街食,要不油不炸不味精,甚難;而且,留家工作,食極不出對咗廿七年嘅個幾間,唔悶有鬼!
既然又悶又無益,扚起心肝半自學講咗成年,諗咗五年嘅煮—飯—!熟知我的朋友皆知,小弟最弱一環(之一)為家頭細務,大可評為垃圾級別。告之朋友一二這新手藝,均竊笑驚訝,均云「好難想像喎」—我都想像唔到—兩週前的我道。

雖然講起來好似好巴閉,實情都不過是煲糙米白米,炒菜芯或生菜,以及蒸上週在塔門買的靚馬友。尚若你知此子之前連飯煲都唔曉用,就明何解煮飯一事,實為小弟有生以來的大創舉!
白飯有,柴米油鹽有,馬友有,糙米也只是在城市至勁之流,買食住健康迷思的糙米一包;所以,每次煮飯,就是到附近的藏在北河街市政局大廈的街市,買菜半斤至一斤。
間中會到這大廈的頂樓食麵,但街市也是只是學煮飯後才踏足的新大陸。雖然每次結果都是買點整都(大概)擺得落口嘅菜芯生菜,但還是會認真逛完為數不多的菜檔。我當然未達望吓就知菜有幾靚的師奶神境界,但不看看,又好像對不起自己這唯一食客。大概有些靚姐靚仔(街市術話,解女同男)較有心思,菜上生露珠外,還有棧黃燈令菜更翠綠,吃下去卻又未覺不同凡響。說到底,我都係亂買,不過一定會買寫住係新界菜嘅菜。後來,見有檔靚姐好似多人買,也就跟風。阿姐人好,笑了笑,每次買菜,都塞了我還未有智慧用得着的蔥一棵。

既然咁高興,不如用簡易的方法表達:

葉問:煮飯畀自己食,最難係邊?
葉答:一定是準備蒸鹹魚和炒菜的薑和蒜:皮削極都唔清,成日都預得太多,雖然都無傷大雅,但好唔專業,而且一搞搞成十分鐘,好悶蛋囉。
葉問:最開心嘅時刻呢?
葉答:炒菜個陣,啲菜沙沙聲,又油又薑又蒜頭,再拎起個鑊剷舞來舞去,有得到烹飪真諦之感!另外,飯煲好後,打開飯煲時的香味,令我覺得好有成功感。
葉問:最辛苦呢?
葉答:嘩,原來煮嘢食真係好熱好熱,到煮好個陣食飯時,個身係臭架!不過冬天應該會好啲。啊,而且要花好多時間,咁簡單嘅單人餐,由買餸、煮餸、食飯到洗碗,要兩個鐘呀真係 —



我一個靜靜對着電腦,吞下不過不失的便飯,發現住家飯還是電視撈來吃好。扭開久久未主動收看的無線,看見午間重播的《尋秦記》。觀嫪毐和呂不韋鬥智鬥力,飯好像可口了。
忽然抽離,想,何時變成獨自在家吃自己煮的飯?這不是兩週前才開始嗎?怎麼好像很遠古。
《尋秦記》播完,比印象中好看,郭峰真是我最愛的電視劇演員。可是,我深信,追看電視劇的時代已經不復再。在家看電視劇送飯的日子,以劣質的淡入交替。細心看的話,不難找到痕跡。幸好,劇情推陳出新,過去的瑕疵,也同樣以劣質的慢鏡淡出。

我原先並非想這樣寫的。但寫着寫着,一頓自己煮的午飯晚飯,構造遠比想像中複雜。

1 則留言:

飯統 說...

你很 ~膠紙~(*請用正統國語唸出)啊!
始入門就白米混糙米齊煮!
可見你天資甚高!!
米俾佢停,起勢煮,你好快變大廚!
而我已進入自己整弄叉燒之境,唔係講笑:O